උණුසුම් පුවත්

වකුගඩුවේ ගලක් ඉවත් කල ඉතිහාසගත සැත්කම


ශ්‍රී ලංකාවේ ප්‍රථම වතාවට අධිබල ලේසර් කිරණ භාවිතයෙන් පුද්ගලයෙකුගේ වකුගඩුවක් තුළ තිබූ විශාල ප්‍රමාණයේ ගලක් ඉවත් කිරීම කළුතර දිස්ත්‍රික් මහ රෝහලේ දී සිදු කර තිබෙනවා.

මෙය මෙරට වෛද්‍ය විද්‍යා ඉතිහාසයේ නව පිටුවක් ද පෙරළමින් සිදුවූ බව එම කාර්යයට සම්බන්ධ වූ වෛද්‍ය කණ්ඩායම කියා සිටියා.

කළුතර දිස්ත්‍රික් මහ රෝහලේ D ශල්‍යාගාරයේ දී පුද්ගලයෙකුගේ වකුගඩුවක් තුළ තිබූ සෙන්ටිමීටර  4ක පමණ ප්‍රමාණයේ විශාල ගලක් වොට් 140ක අධිබලැති ලේසර් තාක්ෂණය යොදා ගනිමින් සාර්ථකව කුඩුකර මුත්‍රා මාර්ගය හරහා ඉවතට ගැනීම මෙහිදී සිදු වුණා.

වකුගඩු හා මෞත්‍ර ලිංගික විශේෂඥ ශල්‍ය වෛද්‍ය කලණ පරණපල්ලියගුරුගේ ඇතුළු වෛද්‍ය කණ්ඩායම මෙම ශල්‍යකර්මය සිදුකර තිබුණා.

මෙම රෝගියාට මීට වසර 7කට පමණ පෙරත් අඟල් 8ක පමණ විශාල කැපුමක් සිදුකර මෙවැනි ගලක් ඉවත් කර තිබූ අතර දෙවෙනි වරටත් ඔහුගේ ගලක් ඉවත්කිරීමට සිදුවූ බැවින් මෙම ක්‍රමය භාවිත කළ බව විශේෂඥ ශල්‍ය වෛද්‍ය කලණ පරණපල්ලියගුරුගේ පැවසුවා.

ඒ හේතුවෙන් රෝගියාට සිදුවන අපහසුතාවය අවම වී ඇති අතර දින හතරක් වැනි කාලයකින් පසු සම්පූර්ණ සුවය ලබා දෛනික කටයුතු කරගැනීමේ හැකියාව ද උදාවන බව වෛද්‍යවරු පවසුවා.

මෙම හයිපවර් ලේසර් යන්ත්‍රය පළමු වරට ශ්‍රී ලංකාවේදී භාවිත කරමින් මෙම සැත්කම සිදුකර තිබුණා.